सुनसरीको कोशी गाउँपालिका–१मा गोलीकाण्ड :५बुँदे सहमति,

सशस्त्रको दाबी दोहोरो भीडन्त, स्थानीय भन्छन्– लेनदेन नमिल्दा हत्या,,सुनसरी, पुस १७। सुनसरीको कोशी गाउँपालिका– १मा बुधबार राति सशस्त्र प्रहरी बलले चलाएको गोली लागेर एक व्यक्तिको मृत्यु भएको छ । ४५ वर्षीय बिजय साह भारतीय सीमा नजिकबाट सामान लिएर फर्कँदै गर्दा सिटी सफारीमा सवार रहेकै अवस्थामा गोली लागेर गम्भीर घाइते भएका थिए । उनको उपचारको क्रममा निधन भएको प्रहरीले जनाएको छ । साहको घर घटनास्थल नजिकै रहेको छ र उनी प्रायः भारतबाट सामान ल्याएर बिक्री गर्दै आएका थिए । उनले गाडीमा करिब ६– ७ बोरा चिनी, सर्फ, चक्लेट लगायतका सामग्री लिएर आउने क्रममा प्रहरीले गोली चलाएको स्थानीयले बताएका छन् । लेनदेनमा कुरा नमिल्दा प्रहरीले गोली हानेको हो । मागेजति रकम नदिँदा गोली प्रहार भयो । दोहोरो झडप भएको होइन, प्रहरीले दुई राउण्ड गोली हान्यो– स्थानीयले भने । तर, सशस्त्र प्रहरी बल, कोशी प्रदेशका (डीआईजी) कुमार न्यौपानेले घटनामा दोहोरो फायरिङ भएको दाबी गरेका छन् । उनले भने– सामान चोरी गरेर आएको अवस्थामा रोक्न खोज्दा गाडी रोकिएन । तस्करको समूहले फायर गरेको हो, त्यसपछि एपीएफले पनि फायरिङ गरेको थियो । जिल्ला प्रहरी कार्यालय सुनसरीका प्रवक्ता, प्रहरी उपरीक्षक चन्द्र खड्काले घटनास्थलबाट दुई राउण्ड गोलीको खोका फेला परेको र मृतकको शरीरमा दुई स्थानमा गोली लागेको देखिएको जानकारी दिए । घटनापछि आक्रोशित स्थानीयले पूर्व–पश्चिम महेन्द्र राजमार्ग, लौकही खण्ड अवरुद्ध गर्दै बिरोध प्रदर्शन गरेका थिए । यसैबीच गोली लागेर भएको मृत्यु पश्चात् उत्पन्न तनाव मत्थर पार्न प्रशासन र स्थानीय प्रतिनिधिबीच ५ बुँदे सहमति भएको छ । बिहीबार प्रमुख जिल्ला अधिकारी बाशुदेव घिमिरेको अध्यक्षतामा बसेको सर्वपक्षीय छलफलले छानबिन समिति गठन गर्नेदेखि मृतकका परिवारलाई राहत र रोजगारी उपलब्ध गराउनेसम्मका निर्णय गरेको छ । घटनाको सत्यतथ्य पत्ता लगाउन सहायक प्रमुख जिल्ला अधिकारीको संयोजकत्वमा, नेपाल प्रहरीका प्रहरी नायव उपरीक्षक र राष्ट्रिय अनुसन्धान जिल्ला कार्यालयका अधिकृत प्रतिनिधि सदस्य रहने गरी एक छानबिन समिति गठन गरिएको छ । उक्त समितिले ७ दिनभित्र प्रतिवेदन पेश गर्नुपर्नेछ । यदि छानबिनबाट सुरक्षा अधिकारीको लापरवाहीका कारण मृत्यु भएको पाइएमा नियमानुसारको राहत एवम् क्षतिपूर्तिका लागि नेपाल सरकार गृह मन्त्रालयमा सिफारिस गरिने सहमति–पत्रमा उल्लेख छ । प्रशासनले मृतक बिजय साहकी श्रीमतीलाई रोजगारी उपलब्ध गराउन प्रमुख जिल्ला अधिकारीले पहलकदमी तथा सहजीकरण गरिदिने प्रतिबद्धता जनाएको छ । साथै, मृतकका छोराले सशस्त्र ्रहरीमा भर्ना हुने इच्छा राखेमा उनलाई नियमानुसार आवश्यक सहयोग र सहजीकरण सशस्त्र प्रहरी बल नं. १ बराह बाहिनीले गरिदिने पनि सहमति भएको छ । छलफलमा भएको सहमतिसँगै स्थानीय बासिन्दा मृतकको शव पोस्टमार्टमका लागि नेपाल प्रहरीलाई हस्तान्तरण गर्न र त्यसपश्चात् दाहसंस्कार गर्न तयार भएका छन् । पूर्वा अञ्चल दैनिक,