मुक्कुम्लुङ साहित्यिक प्रतिष्ठानको वार्षिक उत्सव तथा पुस्तक विमर्श र रचना वाचन कार्यक्रम सम्पन्न,

२०८३ श्रवण २४ । ताप्लेजुङ मुक्कुम्लुङ साहित्यिक प्रतिष्ठानको आयोजनामा साहित्यकार चन्द्र मादेन आन्छनका पुस्तक विमर्श तथा रचना वाचन कार्यक्रम भव्य रूपमा सम्पन्न भएको छ। प्रतिष्ठानको वार्षिक उत्सवका रूपमा समेत आयोजना गरिएको उक्त कार्यक्रममा ताप्लेजुङका साहित्यकार, सर्जक तथा साहित्यप्रेमीहरूको उत्साहजनक उपस्थिति रहेको थियो। कार्यक्रममा ५० भन्दा बढी रचनाकार तथा सर्जकहरूले आफ्ना रचना प्रस्तुत गर्दै रचना वाचन गरेका थिए। कार्यक्रममा सहभागी सम्पूर्ण सर्जक तथा रचनाकारहरूलाई प्रमाणपत्र तथा सम्मानपत्र प्रदान गरी सम्मान तथा प्रोत्साहन गरिएको थियो।कार्यक्रमको महत्वपूर्ण पक्षका रूपमा साहित्यकार चन्द्र मादेन आन्छनका पुस्तकहरूमाथि पुस्तक विमर्श गरिएको थियो। पुस्तक विमर्श भने युवराज आचार्य तथा अर्का वक्ताले गर्नुभएको थियो। उहाँहरूले पुस्तकका विषयवस्तु, साहित्यिक पक्ष, सिर्जनात्मक विशेषता तथा त्यसको महत्वमाथि गहिरो र सारगर्भित ढङ्गबाट विमार्श गर्नुभएको थियो। त्यसैगरी कार्यक्रममा उदय भट्टराईज्यूले कार्यपत्र प्रस्तुत गर्नुभएको थियो। उहाँको कार्यपत्रले कार्यक्रमलाई थप बौद्धिक तथा विषयगत गहिराइ प्रदान गरेको थियो।कार्यक्रमको सञ्चालन लिला आशूज्यूले गर्नुभएको थियो। उहाँको प्रभावकारी सञ्चालनले कार्यक्रमलाई व्यवस्थित र रोचक रूपमा अघि बढाउन महत्वपूर्ण भूमिका खेलेको थियो। यस अवसरमा ताप्लेजुङको साहित्यिक इतिहासमा लामो समयदेखि महत्वपूर्ण योगदान पुर्‍याउँदै आउनुभएका रवीमान लम्जेललाई विशेष सम्मान गरिएको थियो। उहाँको साहित्यिक योगदानको कदर गर्दै दोसल्ला, सम्मानपत्र तथा नगदसहित सम्मान गरिएको हो ।ताप्लेजुङका प्रमुख जिल्ला अधिकारी उमेश कुमार दाहालको प्रमुख आतिथ्यमा सम्पन्न उक्त कार्यक्रममा साहित्यप्रेमी तथा सर्जकहरूको उल्लेखनीय सहभागिता रहेको थियो। मुकुमलुङ साहित्यिक प्रतिष्ठानको वार्षिक उत्सवसँग जोडेर आयोजना गरिएको पुस्तक विमार्श तथा रचना वाचन कार्यक्रम अपेक्षा गरिएभन्दा अझ उत्साहजनक, प्रभावकारी र भव्य रूपमा सम्पन्न भएको महसुस गरिएको छ। समग्रमा, कार्यक्रमले ताप्लेजुङको साहित्यिक गतिविधिलाई थप ऊर्जा प्रदान गर्नुका साथै अग्रज साहित्यिक व्यक्तित्वको योगदानको सम्मान, नयाँ सर्जकहरूको प्रोत्साहन र साहित्यिक विमार्शको संस्कृतिलाई अघि बढाउने महत्वपूर्ण काम गरेको छ।